كيف تسعد زوجتك
1- ابتسم وأنت بتفتح باب البيت .. شكلك أجمل وأنت مبتسم
(اعمل نفسك متفاجئ بالعيال )
2- قل لها : وحشتيني .. ايه الشياكة دي ؟ ..
(ماتدققش لو لسه ﻻبسه نفس الفستان بتاع أول إمبارح .. قول وخلاص وهي
هتفهم وتلبس واحد جديد )
3- لو في يوم حرقت صينية البطاطس خليك ستر وغطى عليها وما تقولش
لأختك ومامتك وافتكر لها طاجن البامية اللذوذ بتاع ايام الخطوبة وسامحها
4- لو لقيت تراب على السفرة ، هات فوطة ولمعه علشان
تكسفها .. قصدي ارسم عليه قلب وسهم وحرف اسمك واسمها وسيب
التراب زى ماهو وهي بعد كده هتاخد بالها.
5- إديها مصروف... ايوة مصروف تجيب بيه اللي نفسها فيه وخصوصا لو
مش بتشتغل .. هتفرح قوي (حتى لو جابت بيه مصاصة ما تناقشهاش )
6- اكتب لها جواب ولو مرة كل شهر (حسن خطك) وحطه في المطبخ
علشان تتأكد انها هتشوفه
7- أول ما تصحى من النوم (أصلها بتقوم فورا من السرير على
المطبخ علشان تآكل .. قصدي عشان تطبخ ) .. طبطب عليها زي الأب ما
بيطبطب على بنته .. الست غلبانه بتحتاج حد يطبطب عليها
(بس مش وهي بتصرخ للعيال .. مش وقته يا كابتن .. طبطب عليها بعد
ما تقدم لك صينية الكنافة وتخلص شغل البيت وتقعد ترتاح .. ساعتها بتبقى
مهدودة فعلا )
8- اشكر فيها قدام مامتك وفي نظافتها (ما تجيبش سيرة التراب اللي
على السفرة) وفي طبيخها (انسى صينية البطاطس) وصبرها على
العيال (حاول تنسى صوت صريخها وهي بتغير لإبنك) وشياكتها
(بغض النظر عن الكلسون اللى كانت لابساه عشان البرد )
9- ما تقارنهاش بحد علشان هي ما تقارنكش بحد
10- مش ﻻزم تحكي عن زميلتك في الشغل الباشمهندسه والدكتورة وتشكر في شخصيتها وترغي وهي قاعدة في البيت متفرغة لخدمتك وخدمة ولادك
وطالع عنيها وفي الآخر تشكر في غيرها (عيب ما يصحش)
11- الستات بتحب الأخبار والفضول .. سيبها تعيش دور المحقق كونان
وجاوب على اسئلتها واحكي لها عن يومك كان عامل ازاى .. هى حاجات
يمكن بالنسبة لك بسيطة بس هي لما بتعرفها وتلاقيك بتحكي بتحسسها بالأمان
12- خرجها مرة كل أسبوع بلاش تحبسها فى البيت
13- أشكر في أهلها هتنبسط اوى
14- هاتلها ورد (بلاش دباديب دول للمخطوبين بس)
15- إديها عيدية في العيد وحطها فى ظرف فيه جواب رومانتيكى
16- لما تتعب وتسخن ارقيها وادعي لها واعمل لها ينسون واظهر شوبة تعاطف (
ورد الجميل اللى عليك واحرقلها صينية البطاطس وانت بتعملها )
17- لو خارجين واشتريتوا حاجه ما تشيلهاش كل الاكياس .. كفايه عليها كيس .
18- بالله عليك..هي أسيرة عندك .. يعني كأنها عصفورة محبوسة في قفص وكانت
فرحانة بيك وعشمها فيك كبير فما تخيبش ظنها وحطها في عينك واتق الله فيها
عشان ربنا يكرمك
ربنا يقدرنى على فعل الخير
ليست هناك تعليقات:
إرسال تعليق